[原创]Mbanjcuengh Gyaeu(壮乡美)

Mbouj rox caez mbouj rox ,

Caez doxbang doxson ;

Faex siuq de cij gon ,

Vunz mbouj son mbouj rox .

Caemh dangq vaiz doxseu , ----- 就象斗牛一样，

Duz deuz duz cix boenq ; ----- 一头跑另一头就追；

Caenh raen vaiz goed goenq , ----- （世上）只见牛顶树蔸，

Byawz raen goenq goed vaiz . ----- 哪见过树蔸顶牛。

Gangj guh fwen hwnj daeuj,

Vunzraeuz gvai fouz beij ;

Haenh bya raemx cihgeij ,

Beiz byoenx bak ok coenz .

Dieg cuengh mbouj dwg cuengh

Dah bya coh mbouj miz ,

Coj goeng yienz an miz

mbouj miz saw geiq hauh ,

Dieg bya hoengq vatvat

Raemx dah gat mbouj lae,

Sawcuengh guh mbouj bae ,

Bouxboux da lae lwed ,

Gwnz bya sawgun hauh ,

Diuz loh hauh sawgun,

Bak dou diep sawgun,

Hawj vunzcuengh baenzguh ?

1)Guh lwglan Bouxcuengh ,

Baenzbaenz cungj dwgrengz ;

Miz gienz mbouj rox ceng ,

Hauq ngaiz deng vunz guenj .

2) Dangq sam goeng huzsiengh ,

Boux siengj doeng siengj sae ;

Beixnuengx sim mbouj caez ,

Dangq naeyou ndaw dah .

Dwg rengz couh dwgrengz,

Dwg rengz guh mbouj hwnj ;

Vunzcuengh gen buh dinj ,

Loh genz hoenx bouxlawz ?

Vunzgyoengq sim mbouj caez ,

Guh saeh mbouj baenz saeh ,

Hong Sawcuengh daih saeh ,

Baenz lawz caez sim hwng ?

1) Byaij diuz gwnz cix cah ,

Gvaq diuz laj cix oen ;

Ra roen mbouj raen roen ,

Vanh saethoenz rixrix .

2) Gou dwg boux vunz saeq ,

Dungxsaej feuh fouz caiz ;

Caenh muengh gyoengq vunzlai ,

Doengzcaez baiz cawjeiq .

1 Vunz lai fwngz hix lai ,

Dumq saejvaiz mbouj cug;

Boux fug boux mbouj fug ,

Caenh buek ceng gvaq ngoenz .

2 Caen saed guh hwnj daeuj ,

Aeu boux gyaeuj guh yinx ;

Daengxgyoengq vunzcuengh ringx,

Caez dox ying hoenxdwk !

3 Boux gonq laemx roengz bae ,

Boux laeng bae gaen dwk ,

Laebdaeb dox dam dwk ,

Giet ndaetdwt bae gung .

4 Yaek guh couh guh hung ,

Lienz dam gung mbouj dingz ;

Guh couh guh daengz hingz ,

Byawz dingz byawz sat mingh .

Lumj faenhmwngz beixnuengx ,

Geijlai cungj yiem noix ;

Hojsik raeuz mij doih ,

Caen doeknaiq lo sou .

1 Gangj gungdwk hwnj daeuj ,

Bouxgyaeuj dwg Guekcing ;

Vunzcuengh bouboux ringx ,

Dox yingfwngz gung dwk .

2 Veiz Guekcing ingyungz ,

Yinx raeuz yungh Sawcuengh ;

Miz cihsiz miz muengh ,

Bouxcuengh cij fatdad .

3 Seiz neix Bouxcuengh raeuz ,

Bougyaeuj ngaiz vunz gvaeg ,

Vunzgun de guh caeg ,

Gaep caeg gienz cuengh raeuz !

4 Bouxcuengh gienz gag guenj ,

Ngaiz Vunzgun naenx dawz ;

Vunzcuengh yaek guh cawj ,

Cawqcawq ngaiz hamhceih !

5 Vunzcuengh a Vunzcuengh ,

Maqmuengh youq giz lawz ?

Gienz gag guenj gag dawz ,

Cij yawzbienh fatdad !

Laj mbwn cien'fanh loh ,

Miz diuz soh diuz ngaeu ;

Cawjeiq raeuz gag aeu ,

Gag caeuzmaeuz gag byaij .

Cien fanh Vunzcuengh raeuz ,

Caeuzmaeuz diuz loh lawz ?

Hawj Vunz raeuz mbouj ngawz ,

Hwng Sawcuengh fouq ak !

Youqgaenj dwg Vahcuengh ,

Caeuq Sawcuengh song diuz ;

Caemh dangq ndaek diuzgiuz ,

Giuz doemq Raeuz caemh sat !!!

Vah cuengh caeuq Sawcuengh ,

Cungj dwg caizbauj raeuz ,

Vunzcuengh guh caeuzmaeuz ,

Baengh Saw raeuz geiq veh .

Aeu saw raeuz caeuzmaeuz ,

Aeu sawraeuz geiq veh ;

Aeu sawraeuz guh ceh ,

Cienz cungj ceh cuengh raeuz .

Beixnuengx gangj ndaej deng ,

Mbouj ceng saek hauzleiz ;

Baenzlawz guh ndaej bae ,

Raeuz caezgya daeuj vanh .

Aeu hawj Vunzcuengh rox ,

Vah coj mbouj ndaej lumz ,

Raeuz guh gijmaz vunz ,

Cuengh vwnzva aeu hag !

Fanj cungjcuz gizci ,

Bouxboux miz swzyin ;

Bouxgyaeuj aeu guh yinx ,

Caez dingx vunzgun hangz !

Sawcuengh mbouj hab gek ,

[Sawcuengh mbouj hab gek ] dwg daj loeng hwnj bae lo !

Beixnuengx gangj ndaej deng ,

Mbouj ceng saek hauzleiz ;

Raeuz beixnuengx doengzcaez ,

Itheij bae cengdued.

Dued aeu gienz gag guenj !

Dued aeu Cuengh sawj gienz !

Duedh aeu gienz veh cienz !

Dued aeu gienz guenj cienz !

Fawz raez gen'buh dinj ,

Yienh haeb linx rai maez ;

Eiqhoz yienzcaemh ndei ,

Lau guh mbaej daengz bwh !