[原创] Youz Diegcuengh Baksaek (11)[僚人家园]——壮族、布依族、岱侬族共同论坛『Liuh 旅行资讯』

AAAAAyingj 发表于 2005-2-21 14:08:00

[原创] Youz Diegcuengh Baksaek (11)

------ DiegcuenghgyaeuCingjsih Cet Youz ------

 Cingjsih baenz lawz youz ? Gou rox miz song giz dieg aeu bae youzyawj ,it dwg CingjsihCangqyozvei ,ngeih dwgGiucouh ,sam dwg Dunghlingz Raemxmbu ,hoeng ngoenz neix miz fwn ,Yawj raemxmbu roen mbouj ndei byaij ,hix haemq gyae ,yawj baenz bae mbouj ndaej lo !
 Hwnj mbonqdaj swiq ok Lijse gwn faenj lex ,gou couh cig bae Cangqyoz vei. Bae daengz giz bak dou , cawx mbaw biuq haj maenz cij ndaej haeuj bae . Haeuj bae mbatyawj ,gij Vunzcuengh minzcuz fungsug canjlanj gaenq ngaiz cawz set , miz vunz dawzDuzmbaj daeuj cuengq hawj vunzyawj .Gou caiq byaij haeuj ndaw bae ,baih ndaw miz aen dax hongh ndeu , ndaem miz hauj lai va ,cuengq dirin geiz guh gingjcaeq , henz de miz aen Cangyozvei Banqgunghsiz, aen dou haep gaenj ,mbouj miz vunz youq , aiqcuengq gya lu ! Song sam faen cung ,gou couh youz satgiz haen lo .
 Bak dou baih rogCangqyozvei , dauq miz di gingjcaeq ,miz aendaemz iq ndeu ,ndaw de hwnj aen dingz ,lij guh diuz giuz byaij gvaq bae , ndaw dingz miz hauj lai vunz homz mouh ,lumj homz guh dwkgeiz,byaij daengz henz mbat yawj ,dwg miz goeng gangj vah Gvei liuj ndeuaeu bejcomz vun lai guh doj . Gou mbouj haengj yawj gij haenx ,couh ok dingzdap ci bae Giucouh .
 Daj Cingjsih daengzGiucouh miz cib lingz goeng leix ,song maenz cienz biuq ci ,it loh roen ,bya hix geiz, raeh naz gingj caeq gig ndei yawj . Saek cib lingz faen cung ,ci couh daengz Giucouh lo !
 Baez roengz ci ,youqgiz haenx raen laeb mizbaj bei sam gok sam mienh ndeu ,gwnz de hauh miz geij cih sawgun, baih gwnz venj sam aenSiuqgiuz hung . ndwn youq giz haenx yawj ,gaenhgiz haenx hwnjmiz geij aen ranz , hai miz geij aen boudiemq,gou naemj ,Giuqcouh couh dwg baenz genj danh ? Hoeng ,giz haenxmbouj gyae couhmiz song dongq bya caen dwg mbouj genj danh ,song aen bya haenx gij gingj caeq gingh yangx ,sang miz caet betbak mij ,gwnz dingjbyamojloxcophomz ,lumj hawj aen bya daiq aen mauh biegndeu , caen gouq lumjguek Itbenj Fuswsanh ,gwnz de faex heu swdswd ,ndei gingjcae ha ! Gou doq muengh yawj aen bya haenx doq byaij haeuj ndaw haw ,cam yawj gya lawz guh Siuqgiuz ,gyoengq de naeuz :Gyagya cungj guh ,haeuj ndaw cin Giuqcouh bae engq gya lai ! O,yienz laiz giz gaenx lij mbouj dwgcaenGiuqcouh !
 Gou caiq ciuq diuz roen byaij roengz bae sam bak lai mij baenz neix , couh raen aen Baizlouz ndeuvang cuengq youq gwnz roen ,aen Baizlouz gwnz sij miz cih sawgun gouq dij[ Giucouh] ,gwnzBaiz louz veh miz doeng duz sei duz ,duz roeg ,duz nyaen ,vunz dawz cae dawz rauq , vaiz ,mou ,lij miz gak cungj vasaek, yienz naeuz fwn raemx ci dwk myox di lo ,hoeng lij ndaej yawj ndaej loq cingcuj .Gwnz baiz louzcingq cungq gan vehduz lungz caeuq duz funghveh dwk gig hung,lumj caen it yiengh , gij gok Baizlouz cuengq deu dik mizduz gaepduzlwg lungz .Va sai ! Aen baizlouz neix gij ndei yawj dozyiengh gig lai !
 Daj bak baiz louz byaijhaeuj ndaw haw ,diuz roen dwg aeu rin bya bu baenz , song mbiengj diuz gaicungj dwgranzcuengh ranzlouzgeqlaux ,daih bouh faenh dwg song caengz , moix aen ranzlouz bak doucungj dwg doumonz gek sik , song faq dou aeu faex na doq baenz ,gwnz de cang miz doengz vanz , an miz songgit dou gven , song mbiengj cang mizdouyiemz , laj de an giemx dou ,giemx dousong gok cuengq rin giemx ,gonj rin giemxdaih bouh faenh dwg dik seiqfueng ,dangq naj dik miz duz lungz ,duz fungh duz gaep rox naeuz gak yiengh doz anq , aen dou baih gwnz miz baj venghdou ,vengh dou baih gwnz capmiz dou dingj ,dou dingj ndaej venj bajdou ciu baiz ,dou ciu baiz gwnz sij miz sawgun , cih lawz coenz lawz gyaeu couh aeu cih lawz ma sij hwnj bae . Dou dingj gwnz aeu vax gaiq , aen aen dou dingj gig miz daek saek ,yiemz vax aeu faexdiuz gep reb, diuqsouj deudik miz doeng duz sae duz ,gig gyaeu ndei ,daengx aen dou monz guh dwk gig geqlauxyouh yiemzywd. Gig miz dangq laux funggek !Engq geiz dwg ,daengxdiuz gaigij mienh cungj dwg yiengh haenx, moix aen gyabak dou cungj venj miz hunghungiqiq gak saekSiuqgiuz ,bak doumiz mehlaux roxnaeuz dahsauhomz naengh dwk gug Siuqgiuz ,guh dwk naeb sim raixcaix . Ha.....Caen dwg diuz gaicuengh ceiq gyaeundeindeu , Daengxcuengh raeuzgiz lawz miz diuz gai ndaej baenz gyaeu youh yaxcaeh lumj yiengh ?
 Gou aeu Vahvujmingzcam gyaq Siuqgiuz ,gyoengq de cungj ndaej aeu Vahcuengh dap gou .vahcuengh Cingjsih caeuq vahcuenghDwzbauj ca mbouj geij lai , menhmenh dingq couh rox gyoengq de gangj gij maz ,hoeng ,yaek caeuq gyoengq de aeu Vahcuengh dox gyau louz ,gaiq niemh biujdaz gwnz miz ceng gig lai , vahdiuh caemh miz ca. Hoeng dingq gyoengq de gangj di le,couh ndaej menhmenh diuz gvaq ma ,aeu gij gaiq niemh gyoengq de ,aeu gij vahdiuh gyoengq de damzgangj lo ! Yiengh haenx cij ndaej caeuq gyoengq de aeu vahcuengh gyau louz !
 Gou youqdiuz gai byaijbyaij , gyaeuj gai miz aen daiz heiq hungsang ndeu ,ndaw de fa ciengz cingq ding aeu Sawcuenghsij dwk gig hung gig gyaeu ndei :CINGJSIH GIUCOUHDAIZHEIQ .laj de dwg hangz sawgun,Sawcuengh youq giz neix lij miz yungh ha !
 Yiengh haenx ,gou giet ding aeu Sawcuengh dinghguhsong aen Siuqgiuz !
 Gou byaij hwnj gwnz gai dingj ,gwnz de miz baiz ranzcuengh ndeu ,baiz ranzxcuengh haenx baih laeng couh dwg dongq bya sang ndeu , gou raen miz song dah sau cingqnaengh youq giemx dou guh Siugiuz , couh gvaq baecaeuq gyoengq de gingj .Gou cam : Guh aen siugiuz geij lai cienz ? Miz dahsau ndeu han gou : Mwngz guhcungj law?Gou han : Miz geij lai cungj ?De han : Cungj hung hix miz ,cungj iq hix miz ! Doq gangj de doqdawz gak yiengh hung iq Siuqgiuz hawj gou yawj , gou yinx aen lawz ,de couh naeuz gij gyaq gou nyi ! Aen roek maenz ,bet maenz ,cib maenz ,cib haj maenz ,sam cib maenz ,bak maenz ,bak roek maenz ,song bak maenz hix miz , gou yaek guh aen haemq hung di ,guh aen cib haj maenz ,guh song aen ,lij hawj deyouq gwnz Siugiuz deu miz: Sawcuengh yiengh hwnj bae !Gou couh aeu bit sij hawj gyoengq de yawj . Hoeng song dah sau haenx cungj naeuz : Song raeuz seiz neix hong yaengq ,mbouj ndaej caeuq mwngz guh ,gou heuh lingh boux caeuq mwngz guh ! Yiengh haenx ,de couh bae ra dah sau ndeudaeujciep gij hong gou . Dah sau haenx singq Cauq ,naj loq gyaeuq ,ndang miuzdiuz ,aen ranz de youq baiz gwn gandaih seiq daih haj hauh ,gou gyau ngeih cib maenz dingh guhlex caiq daengq vah song ngoenz haeuh menh daeuj aeu ! 
 Caen hoj sik , ngoenzlaeng gou hix mbouj ndaej bae yawj de guh ndaejcaengz ,song aen Siuqgiuz haenx caemh dangq soengq hawj dah sau gyaeuhaenx guh geiq niemh lo !
 Gou byaj byaij lex ,raen rog haw miz diuzraemxdah iq ndeu ,lij miz diuz giuz ndeu ,gyaeuj giuz miz aen miuh ndeu ,henz dah miz hauj lai vunz guh saeg swiq byaek ,song gyaeuj giuz miz song caz faex cuk , gij haenx gyaeb baenz fuk doz gig gyaeu ndeindeu . 
 Youz satGiuqcouh , sim angq sim sangj , sij geij hot fwen guh geiq :
 
 1 Cingjsih Giucouh gyaeu ,
 Vunz raeuzhix gvaigyiuj ;
 Ok mingz dwg Siugiuz ,
 Gyagya caez yiu guh .
 
2 Siugiuz miz hung iq ,
 Mwngz ngamjeicouh cawx ,
 Mbouj nanz cuengq nanz dawz,
 Venj gyawhoz guh gingj ,
 
3Gai Giuqcouh haw gouq ,
 Dou geq laux guh mienh
 Sau naengh giemxcin sienq ,
 Deudeu cienz couh haeuj ,
 
4 Haw rog gingjcaeq gyaeu ,
 Giuzgyaeuj sau vuen angq ,
 Guh saeg caiq caemxndang ,
 Mbauq yangz raensimdoengh.

5Dieg cuenghgai Giuqcouh ,
 Bouxlawz youz cungj yaenx,
 Vunzgyae caeuq vunz gaenh ,
 Cungj caez haenh de ndei .

AAAAAyingj 发表于 2005-2-22 10:55:00

Yiengh haenx haemq ndei yawj !

页: [1]

僚人家园's Archiver

[原创] Youz Diegcuengh Baksaek (11)